Padulong maligo gigukod gipatay

CEBU, Philippines – Patay ang usa ka lalaking padulong untang maligo human gipaulanan og bala sa iyang silingan kagahapon sa buntag sa sitio Pailob barangay Sambag 2.

Si Jimmy Amen, alyas Jimboy, 31, taga Villagonzalo sa barangay Tejero nabulit og bala sa kalawasan nga nakaingon sa kamatayon niini, gitumbok nga mipatay kaniya nailhan lang sa pangalang Jay-R.

Ang biktima nga nagtapis lang og tuwalya sumala pa ni PO3 Geoffrey Gutual sa Homicide Section wala makabantay sa kalit nga pagsulod sa suspek dayong pusil kaniya makadaghang higayon.

Ang biktima misuway unta pagdagan sulod sa balay apan gigukod siya sa suspek ug giusban pagpusil diha sa taas sa balay ug dihang nahagba gibulit kini og bala sa kalibre .45.

Si SPO4 Eugene Raganas sa Crime Scene Investigation Unit (CSIU) nagkanayon kini sa pakighinabi sa Banat News nga ilang nakuha sa crime mao ang duha ka kabhang sa nahisgutang kalibre, duha ka buhing bala nga wala kabuto ug usa ka slug.

Ang biktima misuway pa unta sa pagsulod sa kwarto apan nakakandado kini maong naapsan sa mamumuno. Usa sa nakita nga anggulo mao ang kalambigitan niini sa ilegal nga drugas.

Kahinumduman nga ang biktima gidakop kaniadto tungod sa giingong pagpa-kidnap niini sa asawa sa Australian national nga nadiskubrehan sa kapolisan nga “kidnap me” diay.

Ang maong Australian national nagpatabang sa Investigation Detective Management Branch (IDMB) apan dihang nasikop si Amen nahibaw-an nga hinimo-himo ra diay kini sa babaye ug sa suspek.

Nakuha kang Amen ang kalibre .357 nga walay lisensya ug usa ka paketeng shabu niadtong hitaboa. Nasayran sa Banat News nga adunay pending nga warrant of arrest si Amen sa RTC Branch 10 sa kasong illegal possession of firearm nga gipirmahan ni Judge Soliver Peras.