CEBU, Philippines – Walo ka tawo ang naangol apil na ang duha ka mga batang usa pa ka tuig ug ang usa nga upat ka bulan dihang aksidenteng natagak sa kanal ang multicab nga ilang gisakyan sa Trans-Central Highway sa barangay Cansumoroy bukirang bahin sa lungsod sa Balamban niadtong miaging adlaw sa alas 4:25 sa hapon.
Apan gawas nga nangaangol sa aktwal nga aksidente nadungagan pa gyud kini dihang nayab-an sila sa mga gikargang muriatic acid.
Ang mga naangol mao sila si Roel Sabroso, 28, taga Cantuod, Balamban, Marjorie Edralin, 29, taga Mabolo siyudad sa Sugbo, Generose Genpisao, 17, taga Quezon Bukidnon, Jernnifer Genpisao, 19, Edralin Angela, Madronial Mayonesa, ingon man ang duha ka batang sila si Justine Clyde Mejares, ug Nicole Cañares.
Ang drayber sa multicab mao ray bugtong wala makaangkon og kadaot sa lawas giilang si Leonardo Java Jr, taga Buhisan siyudad sa Sugbo.
Matud pa ni PO2 Cesar Climaco sa Balamban Police dihang nahinabi sa Banat News gikan sa siyudad sa Sugbo ang maong multicab paingon unta sa barangay Cantuod Balamban apan kalit lang nawad-an og preno ang maong sakyanan ug tungod sa kahadlok sa drayber nga matagak sa lawom nga pangpang iyaha kining gitagak sa kanal sa tuong bahin sa karsada.
Maayong pagkayabo sa katorse ka container nga puno sa muriatic acid nga karga hinungdan sa pagkapaso sa tanang mga pasahero nga sakay sa luyong bahin apil na ang duha ka mga bata ug maayo nalang nga naatol nga nagsunod si PO3 Rolando Nacarro sa Balamban Police nga nagmotorsiklo ug daling mitabang ug mihatud kanila sa Balamban District hospital ug luwas na sa peligro. – Darrel Carumba (BANAT NEWS)