Pusher sikop

CEBU, Philippines – Nadakpan sa checkpoint sa kapulisan ang gitumbok nga notadong tigpayuhot og gidiling drugas sa isla sa Bantayan sa barangay Mojon sa maong lungsod sa milabay’ng gabii. Ang suspek mao si Jesus Memoria Andrino, 51, taga barangay Tikad, Bantayan nga matud pa ni Insp. Almirante Bacayo, hepe sa kapolisan sa maong dapit dihang nahinabi sa Banat News gisita nila si Andrino pag-agi niini sa checkpoint gikan sa lungsod sa Sta. Fe. Dihang ilang gipahunong ug girekisa nadiskubrehan nila ang upat ka paketeng shabu ingon man mga linikit nga dahon sa Marijuana ug mga kagamitan sa pagsuyop og gidiling drugas. Matud pa ni Bacayo dugay na silang nakadawat og report kabahin sa pagpayuhot og gidiling drugas sa suspek sa lungsod sa Sta. Fe ug Bantayan. – Darrel Carumba (BANAT NEWS)