Magtiayon nadisgrasya tungod sa iring

CEBU, Philippines – Tungod sa paglihay nga makaligis og iring, magtiayon nadisgrasya nga nakaingon sa kamatayon sa bana ug pagkaangol sa iyang asawa diha sa Poblacion lungsod sa Moalboal niadtong Martes sa alas 5:00 sa buntag.

Ang namatay mao ang nagmaneho sa motorsiklo nga si Jose Casipong, 48 , sa barangay Bitoon sa lungsod sa Dumanjug samtang ang naangol mao ang asawang angkas nga si Luisa Casipong.

Matud pa ni PO1 Eric Bongbong sa Moalboal Police dihang nahinabi sa Banat News ang magtiayon gikan sa lungsod sa Dumanjug ug paingon unta sa lungsod sa Ginatilan sakay sa ilang motorsiklo.

Gikatahong parehong walay gisuot nga mga crash helmets ang duha samtang nagsakay sa maong motorsiklo.

Samtang nagdagan ang motorsiklo sa nahisgutang dapit dihay usa ka iring nga giingong kalit lang milabang sa karsada ug sa kakalit sa paglabang naapeke ang drayber sa paglikay hinungdan nga naligsan niya kini.

Apan nisapid ang dagan sa motorsiklo paingon sa daplin ug misampak sa sementadong paril daplin sa karsada hinungdan sa pagkalabay sa magtiayon ug nabunal sa maong paril.

Ang mga estambay diha sa maong lugar maoy daling nipahibawo sa kapulisan ug midala kanila sa Badian District Hospital apan tungod sa grabeng kahimtang sa lalaki gibalhin kini og tambalanan dinhi sa dakbayan sa Sugbo apan namatay gyud kini una pa makaabot.

Luwas na hinuon sa peligro ang asawa niining igo lang nakaangkon og ginagmay'ng samad ug pangos sa kalawasan. – Darrel Carumba (BANAT NEWS)