"Crime prone area" di na ipagamit

CEBU, Philippines - Gihukom ni Chief Supt. Lani-O Nerez, director sa Police Regional Office (PRO-7) nga ang terminolohiyang “crime prone area” (CPA) ilisan og “increase of crime volume” (IOCV) aron dili malain ang pagsabot sa katawhan sa usa ka lugar nga tawgong CPA.

Gihimo ni Nerez kining maong koreksyon kay mikisikisi ang mga kapolisan sa dakbayan sa Sugbo dihang giingong ang maong dakbayan maoy CPA sa tibuok Central Visayas.

Miuyon si Nerez nga tinuod gyud nga may kalainan ang terminolohiyang CPA kay sa IOCV kay ang nahauna nagpasabot nga peligro kaayo ang tibuok dakbayan sa Sugbo nga makapaidlas sa mga dumoduong ilabi na sa mga turistang langyaw ug lokal.

Gani sa sayo pa nakaingon ang kadagkoan sa kapolisan sa dakbayan sa Sugbo nga murag panurambaw ang maong pamahayag kay indirekta kining nag-abog sa katawhan pahilayo sa dakbayan sa Sugbo. - Guam Logronio (BANAT NEWS)