Manglungkabay sa Carmen nasikop

CEBU, Philippines - Duha ka giingong notadong manglungkabay sa lungsod sa Carmen nga maoy gidudahang responsable sa tanang pagpangawat sa mga eskuylahan sa maong lungsod.

Ang mga giingong notadong kawatan nailhan nga sila si Cristopher Berot ug Marcelito Pisiao, taga barangay Corte sa nahisgutang lungsod samtang usa nga gawasnon nailhan nga si Rodrigo Borasca.

Si Carmen Police Chief Insp. Carlos Reyes mipresentar sa duha ngadto ni Mayor Sonia Pua human ang mayor niadtong milabay’ng semana mipatawag og tigom sa kapolisan ug opisyales sa mga tunghaan sa paghimo og mga pamaagi pagsikop sa mga manglungkabay diha sa ilang lungsod.

Matud pa ni Reyes nga ang duruha ug si Borasca maoy responsable sa mga nagsunod-sunod nga pagpanglungkab sa ilang lungsod ilabi na sa mga public schools sa bukirang bahin sa ilang lungsod.

Ang mga tunghaan sa barangay Cantumog, Upper Natimao-an, Cantipay ug Cantucong maoy mga nabiktima niini lakip na ang mga tindahan ug balay sa ubang dapit sa maong lungsod.

Dili palang dugay ang kapolisan nakadawat og report gikan sa mga nagkalain-laing eskuylahan nga gikawatan sila og mga gamit susama sa computer ug mga DVD players.

Niadtong Lunes sa gabii ang kan-anan sa Saint Benedict Monastery sa barangay Corte gisulod usab sa wala mailhing mga kawatan hinungdan nga mipatawag og tigum ang mayor sa mga polis ug sa mga barangay officials.

Si Cogon barangay Captain Virgilio Escuton ug si Reyes nakadawat ug report nga ang mga suspetsado naglaroy-laroy sa sitio Kanag-kaan hinungdan nga ila kining gisusi ug gidakop apan nakaeskapo si Borasca.

Nasakmit sa kapolisan ang pipila ka mga kagamitan sa eskuylahan ug uban pang mga accessories gikan sa mga suspetsado. - Lesley Caminade (BANAT NEWS)