Kolektor gitulis P300 mil nadala

CEBU, Philippines - Sobra sa P300 mil ang nasakiyo sa tulo ka mga nagtaptap nga mga tulisan human nila tulisa ang usa ka load collector sa barangay Bahay sa lungsod sa Sibonga niadtong Martes sa alas 7:30 sa gabii.

Ang gitulis mao si Jovencio Tecson, 34, taga barangay Guiwanon sa lungsod sa Argao ug maoy load collector kuyog ang drayber niining si George Sarael, ang duha nagtrabaho sa negosyanteng si Marco Miranda sa Taloot.

Matud pa ni PO2 Ederlino Bacusmo, imbestigador sa Sibonga police Station sa dihang nahinabi sa Banat News paingon nang mopauli sa lungsod sa Argao gikan nga nangolekta sa lungsod sa Santander, Samboan, Ronda ug Carcar si Tecson kauban ang drayber niining si George Sarael.

Gikatahong nagsakay na sa motorsiklong gimaneho ni Sarael si Tecson nga nagdala sa bag nga gisudlan sa mga salaping kinolekta sa dihang kalit lang gibabagan sa tulo ka mga nag-ski mask nga mga lalaking sakay usab og motorsiklo.

Si Sarael daling mipahunong sa motorsiklo sa dihang kalit nga usa sa mga tulisan ang mikanaog dayong tion kanila og armas dayon miingon og “bag ra ang among tuyo” dungan sa paglabni niini.

Tungod sa kahadlok sa duha nga pamusilon wala nalang sila moreklamo.

Daling misibat ang tulo ka suspek nga nag-angkasay sa usa ka motorsiklo paingon sa habagatan nga bahin nga direksyon.

Silang Tecson ug Sarael igo nalang nagpa-blotter sa kapolisan.

Ang kapulisan padayon pang nagsusi pagtumbok sa tulo ka mga tulisan apil na ang posibilidad nga inside job ang maong hitabo sanglit nakahibalo man ang mga gikatahapan nga nagdala sila niadtong tungora og dagkong kantidad. – BANAT NEWS