Igsuon sa mayor sa Consolacion nakuhaa'g armas way lisensiya

CEBU, Philippines - Gipasakaan og kaso sa kapolisan kagahapon sa buntag ang magpapatigayon nga igsuon ni Mayor Avelino Gungob sa lungsod sa Consolacion nga nadakpan sa checkpoint sa kapolisan sa pagdala og armas nga walay lisensiya.

Ang gipasakaan og kaso mao si Joselito Judilla Gungob, 50, biyudo, taga Pulpogan sa nahisgutang lungsod human masakmiti og armas nga kalibre .45 uban sa 21 ka mga bala ug tulo ka magazine niini.

Si Gungob nadakpan ni Sr. Insp. Jesus Elmer Fernandez ug mga kaubanan atol sa ilang checkpoint nga gihimo niadtong miaging Sabado sa gabii sa barangay Pulpogan.

Nagsakay kini og motorsiklo ug nahiagi kini sa checkpoint nga ilang gihimo dihang nagpaingon kini pauli sa ilang panimalay sa nahisgutang dapit.

Wala makapakita og mga dokumento si Joselito sa gidala niyang armas ug mga bala nga maoy hinungdan sa pagpasaka og kaso nga kalapasan sa Republic Act 8294 kun illegal nga paghupot og armas.

Si PO3 Allan Maglangit sa kapolisan sa maong lungsod miingon nga ilang gihingusgan pagpahimutang og mga checkpoint panahon sa kagabhion sa nahisgutang lungsod isip kabahin sa pagsumpo sa mga pagpanulis nga ang mga suspetsado magsakay og motorsiklo.

Dunay report nga giingong may gihimong maniobra sa pangalan niini aron di maduhig ang pangalan sa mayor.

Apan si Sr. Supt. Jesus Gacquing, director sa Cebu Provincial Police Office mikumpirmar nga igsuon gyud sa maong mayor si Gungob ug miklarong wala gyud hinuon mosuway og duol kaniya ang nahisgutang mayor kabahin sa pagkasikop sa iyang igsuon. - Guam Logroño (BANAT NEWS)