'Waray fixers' susihon - OMB

CEBU, Philippines - Andam nga mopahigayon og imbestigasyon ang buhatan sa Visayas Ombudsman sa gikatahong imported nga mga “Waray fixers” diha sa Land Transportation Office kon LTO-7 nga gikan sa Leyte.

Si Assistant Ombudsman Virginia Palanca Santiago nga nahinabi sa Banat News nagkanayon nga ang iyang buhatan dili magpanuko sa pag-imbestigar sa gitumbok nga mga fixers nga taga Leyte kinsa nagpa-ila sa mga biktimang mga tawo sila ni LTO-7 regional director Raul Aguilos dinhi sa Sugbu.

 Apan gitataw ni Santiago nga mas maayong may formal letter of complaint nga madawat ang ilang buhatan o ba kaha mobisita sa ilang buhatan ang mga nabiktima niining maong mga fixers nga giingong anaa mag-estambay sa LTO-7.

Kini aron mas dali ug mas paspas ang ilang pagpahigayon og imbestigasyon pinaagi sa pagpatawag sa mga gireklamong opisyal sa labing daling panahon.

Mga reklamo nga nahidangat sa Banat News nagtumbok nga ang mga driver’s license sa mga motoristang madakpan sa mga traffic violation tuyuon sa pagsumiter sa mga traffic enforcer ngadto sa LTO office labing minus duha ka adlaw gikan sa pagdakop.

Kini bisan pa man og ang lagda sa LTO nagmandong kinahanglang bayran dayon sulod sa 24-oras ang traffic violation hinungdan nga matagbaw og hinuwatay ang mga motorista.

 Sigun sa reklamo nga samtang magpaabot ang mga motorista sa lisensiya moduol dayon ang mga giingong “Waray fixers” sulod gyud sa LTO office samtang ang mga giingong lokal fixer atua sa gawas sa LTO office.

Ang maong mga fixers diha sa sulod magpailang tawo ni Aden Belsa ang hepe sa operations sa LTO ug sa direktor ug motanyag dayon sa daling pagproseso sa pag-release sa ilang lisensiya bugti sa dili mominus duha ka libo ka pesos.

Si Santiago mitataw hinuon nga ang ilang buhatan magpaabot sa formal nga reklamo sa mga miyembro sa Nagkahiusang Driver sa Sugbu (NADSU) kalabot sa ilang alegasyon nga daghang mga deputized agents sa LTO ang miabuso sa ilang pagpanakop sa mga traffic violators hinungdan nga gikwestiyon usab ang kwalipikasyon sa mga deputized agents. - Chester Abadilla (BANAT NEWS)