Lasbag nga way helmet tiklo

CEBU, Philippines – Mikagulkol sa prisohan ang duha ka tawo human kini hidakpi sa kapolisan kay nagsakay sa motorsiklo nga lasbag kaayo ug wala pay helmet didto sa dalan Jakosalem, barangay Cogon- Ramos kagahapon sa ala 1:30 sa kabuntagon.

Sila mao si Narsales Bonjoc Lumapasa Jr., 30 , nga taga barangay Tabuk, dakbayan sa Mandaue, ug ang iyang angkas nga si Jerry Talaugon Alilin, 22 , nga taga sitio Limonsito, barangay Umapad, Mandaue City.

Nasikop sa kapolisan sa Fuente Police Station ang duha human sa usa ka ginukdanay dihang misuway kini pagsibat ug wala manumbaling sa kapolisan kinsa mapara kanila kay walay helmet samtang nagpadagan sa ilang motorsiklo.

Dihang nasikop na, nasuta sa kapolisan nga puwerting lasbaga kay gawas nga nagkayuring ang sinultihan, pwerte pang bahua’g bino.

Giandam na ang kaso nga isang-at batok sa maong mga dinakpan kinsa nagpahayahay na karon sa prisohan sa Fuente Police Station. – Johar Lapasaran (BANAT NEWS)