CEBU, Philippines – Mikabat sa 11 ka traysikad para sa mga basurero nga sakop sa Eco Aids ang gihatag sa Rotary Club of Mactan (RCM) alang sa programa nga “Basura Mo, Panginabuhian Ko” sa dakbayan sa Mandaue.
Ang maong mga traysikad maoy katumanan sa pasalig sa RCM sa ilang suporta sa kagamhanan sa Mandaue sa paningkamot nga mahapsay ang koleksyon sa basura sa maong lugar.
Gani nagpinirmahay na ang RCM ug ang kagamhanan sa dakbayan sa Mandaue og usa ka Memorandum of Agreement (MOA) aron paglig-on sa maong kasabotan nga ang nahauna tinuoray nga motabang alang sa maayong paghipos sa basura sa Mandaue.
Matud pa ni Dr. Caridad Labe ang Presidente sa RCM nga gusto silang molampos ang maong proyekto nga Basura Mo, Panginabuhian Ko ilabi na nga usa kini ka proyekto nga gipasiugdahan ni 6th District Congresswoman Nerissa Soon Ruiz .
Ang 11 ka mga traysikad pulipulihan kini paggamit sa 22 ka mga Eco Aids sa ilang pagpanghakot sa basura sa dakbayan.
Tungod niini mapasalamaton kaayo si Ruiz sa dakong abag nga natampo sa mga basurero alang sa kalamposan ning programa nga Basura mo Panginabuhian Ko. – Bong Soriano (BANAT NEWS)