Taga CCMC pa-esplikahon kay nagpabayad

CEBU, Philippines – Daghan unya ang angay’ng ipasabot sa kadagkuan sa Cebu City Medical Center (CCMC) ngadto sa hawanan sa konseho ugmang adlawa gumikan sa giingong pagpabayad sa maong tambalanan bisan og hilanat lang ang ilang sakit.

Si Konsehal Gerardo Carillo nahibulong niini tungod kay ang kagamhanan sa dakbayan dunay gigahing pundo alang sa maong katuyuoan.

Nakonpirmar sa konsehal nga pabayron gihapon sa CCMC ang pasyente nga gidudahang dunay dengue dihang siya dunay gisugo niini.

“Nagtoo tang libre mao nang nahibulong ko nganong pabayron man nga mao man nay atong gi-promote nga libre para moadto sa CCMC,” sumala ni Carillo.

Tungod niini gipapugngan una sa konsehal ang dugang pundo alang sa CCMC hangtud nga di makahatag og eksplinasyon ang kadagkuan sa maong tambalanan.

Una nang gimanduan sa City Council ang mga opisyal sa CCMC ingon man sa City Health Department paghatag og katin-awan atol sa sesyon ugmang adlawa.

Buot masayod ang konseho kun nganong padayon gihapong midaghan ang nasakit og dengue sa siyudad taliwa sa gihingusgang kampanya niini.

Sa susamang kalamboan gipahibawo usab ni Carillo nga ila nang sugdan ang house-to-house campaign sa kabarangayan nga dunay daghang kaso sa dengue.

Gitataw sa konsehal nga ang ilang tumong niini nga mamahimo pang epektibo ang anti-dengue campaign nga gipatuman sa City government.

“We are focusing sa mga areas nga high risk sa dengue, atong gi-tag ang mga balay unya i-cordon nato and we will conduct a house-to-house inspection,” dugang ni Carillo.

Ang mga sanitary inspector sa City Health mao unyay sangunan pagpahigayon og pakisusi sa mga panimalay nga dunay mga biktima sa dengue. – Elly Bolonos (BANAT NEWS)