CEBU, Philippines – Giduso na sa dakong lider sa United Opposition (UNO) nga si kanhi Presidente Joseph Estrada ang oposisyon sa Sugbo nga gipangulohan sa negosyanteng si Jonathan “Atan” Guardo alang sa eleksiyon sa 2010 sa Sugbo.
Gipahibalo ni Estrada atol sa press conference kagahapon nga si Guardo nahimo na’ng standard bearer sa UNO sa Sugbo sa miaging eleksiyon.
Sa susamang higayon, gipahibalo usab ni Estrada nga hiusahon niya ang mga lider sa oposisyon aron pildehon ang mga kandidato sa administrasyon.Gawas kaniya, sila si Senador Mar Roxas, Manny Villar, Chiz Escudero, Loren Legarda, Mayor Jejomar Binay sa Makati ang mga sakop sa oposisyon nga modagan pagka-presidente sunod tuig.
Matud niya nga mopatawag siya og tigum sa mga lider sa oposisyon aron magkasabot kinsa kanila sa oposisyon ang padaganon pagka-presidente.
Usa ka tinubdan gikan sa oposisyon nga mihangyong dili magpaila nagkanayon sa Banat News nga si Estrada mismo ang modagan kun dili magkasabot ang mga lider sa oposisyon.
“Ang scenario kasi ngayon, lahat sila tatakbo. If that will happen, he (Estrada) will run,” matud sa tinubdan.
Si kanhi Senador Ernesto Maceda mipahibalo nga andam gihapon ang makinarya ni Estrada lukop nasud ug dinhi sa Sugbo.
Si Estrada miingon nga mahibaw-an ang iyang plano modagan pagka-presidente sa mosunod nga usa o duha ka bulan.
Sa legal opinion ni Atty. Aquilino “Koko” Pimentel III nga gi-apod-apod sa mga tigbalita, kini nagkanayon nga si Estrada kwalipikado nga modagan pagka-presidente tungod kay dili kini “incumbent president” nga maoy gidid-an sa Konstitusyon magpa-reelect ug dili usab “reelection” kun modagan kini tungod kay dili man siya incumbent.
Si Pimentel usa sa pipila ka sakop sa oposisyon nga modagan pagka-senador. Uban kaniya silang Ted Failon sa ABS-CBN ug Grace Poe nga anak ni anhing Fernando Poe Jr., ug ang magpasubli nga si Senador Ramon “Bong” Revilla Jr. – John Rey Saavedra (BANAT NEWS)