'Oposisyon sa Lapu huyang'

CEBU, Philippines – Huyang pa ang oposisyon sa dakbayan sa Lapulapu nga makigsakbang sa kandidato sa administrasyong Radaza kung kini magkabuwagbuwag sumala pa ni kanhi konsehal sa dakbayan sa Lapulapu Atty. Eugene Espedido.

Matud pa ni Espedido sa pakighinabi sa Banat News kun ang bugnong lugaynon sa 2010 adunay upat ka kandidatong modagan pagka-mayor ang labing bintaha mao ang kandidato sa administrasyon.

Gipasabot ni Espedido nga kun dili magkahiusa sila ni incumbent Councillor Junard "Ahong" Chan, negosyanteng si Efrain Pelaez ug DILG Under Secretary Lito Ruiz nga pulos buot modagan pagkamayor sa maong dakbayan dako kaayo ang posibilidad nga maparot lang sila sa maong piniliay.

Matud pa ni Espidido nga kinahanglang lingkoran sa tulo ang ilang lakang sa pakigsakbang sa administrasyong Radaza ug magkahiusa kun kinsa ang mamahimong standard bearer sa oposisyon sa dakbayan sa Lapulapu.

Si Espedido nagkanayon nga dili pa igo ang kasinatian ni Chan sa mga makinarya sa politika nga iyang nakat-unan dihang tua pa siya sa poder sa pundok ni Radaza.

Samtang dili usab paigo ang mga pasalig sa mga negosyante ug class A ug B nga mga residente nga mosuporta kang Pelaez aron siya modaog sa piniliay.

Walay dag-anan ang popularidad ni   Ruiz tungod kay nasayod ang mga taga siksto distrito nga ang kapikas niining si Kongresista Nerissa Soon-Ruiz maoy nanghatag og mga imprastraktura ug pundo sa mga proyekto sa maong dakbayan. – Bong Soriano (BANAT NEWS)