7 balay kahilayan gi-monitor sa CAIB

CEBU, Philippines - Pito ka mga balay kahilayan sa dakbayan sa Sugbu ang padayon karong gi-monitor sa City Anti-Indecency Board (CAIB) human makadawat og report si acting mayor Michael Rama nga nisiaw na usab ang malaw-ay'ng pasundayag sa mga night spots sa siyudad.

Ang acting mayor niduso sa nadawat niining reklamo ngadto sa CAIB nga maoy nitahas sa City Intelligence Branch (CIB) pagpahigayon og monitoring.

Sa nasayran, ang CIB maoy usa sa mga aktibong ahensya nga sakop sa CAIB ug maoy sagad tahasan pagpahigayon og mga pagpangronda.

Lima sa mga balay kahilayan sa dakbayan nga gipanid-an sa CIB giingong nahamutang sa uptown samtang ang laing duha anaa sa downtown area.

Matud pa ni CAIB chairman Rene Josef Bullecer nga iyang gipaabot ang CIB niining semanaha nga mopadangat kanila og report.

Miingon si Bullecer nga lakip sa ilang gipapanid-an mao ang tulo ka gay bars sa siyudad nga gikatahong nibalik na usab sa naandan niining pasundayag.

Usa niini ang gikatahong makapila na pasirad-i sa CAIB tungod sa nagkadaiyang mga kalapasan gawas sa gihimong “lewd shows”.

Nagkanayon si Bullecer nga sila dili magmakuli pagpasira niini og balik kung masakpan pag-usab nga nagpasundayag og malaw-ay'ng talan-awon. – BANAT NEWS