Sakyanan sa kapitan gibato sa Tabuelan

CEBU, Philippines - Maayong pagkagusbat sa windshields sa sakyanan sa usa ka barangay kapitan human gibato niadtong Sabado sa gabii sa barangay Poblacion lungsod sa Tabuelan.

Nangayog pakitabang si Kapitan Imme Sipalay, 35, sa barangay Victoria lungsod sa San Remigio sa kapulisan sa Tabuelan human sa maong insidente.

Si SPO1 Amelito Alcala sa Tabuelan Police Station nga nahinabi sa Banat News nagkanayon nga si Sipalay kuyog sa mokabat napulo ka sakop sa Youth Organization ingon man ubang opisyales sa barangay sa ilang lugar giingong nag-inom sa usa ka videokihan daplin sa baybayon sa nahisgutang lugar.

Apan sa dihang namauli sakay sa Mitsubishi Van XDW-367 nga gipanag-iya sa kapitan kalit silang gibato sa wala mailhing mga tawo.

Matud pa ni Alcala ang usa sa dakong bato nga gilabay motimbang og duha ka kilo ug kini maoy milapos sa tuong bintana sa sakyanan nga nakaingon sa pagkaigo sa ulo ni Herni Bedrijo.

Ang biktima gidali sa pagdala sa Tuburan District Hospital alang na sa dinaliang pagpatambal sa ulo niini. Matud pa ni SPO1 Alcala nga way bisan kinsang nakakita nilang kapitan Sipalay kun si kinsa ang nibato kanila.

Apan kagahapon sa buntag duha ka mga estambay sa nahisgutang lugar nga sila si Alfie Bravo, 19 ug Jongo Encarquez ang gi-imbitar human dunay nakatug-ang sila maoy namato sa sakyanan. – BANAT NEWS