Hangyo sa Duljo traysikad gibasura

CEBU, Philippines - Gibasura sa Cebu City Traffic Operations and Management (Citom) ang gipadangat nga suwat-hangyo sa barangay Duljo-Fatima nga tugutang makapamasahero ang labing minos usa ka gatos ka traysikad sa ilang barangay.

Ang hangyo gipadangat sa nahisgutang barangay ngadto sa Citom tungod usab sa gihingusgan niining pagpanakop sa mga traysikad diha sa kabarangayan.

Matud pa ni Citom Executive Director Arnel Tancinco nga nalatid sa ordinansa sa siyudad nga gidili ang traysikad nga himuong pasaheroan.

“Atong gibasura ilang request on the basis nga dili allowed ang board nga mohatag og approval kay absolute man ang ban sa traysikad,” sumala ni Tancinco.

Gani miingon si Tancinco nga bisan ang mga traysikad nga gihimong kargahanan mahimo gihapong tangtangan og sidecar kung kini walay permit.

Midugang ang Citom executive director nga bisan pa kung ang traysikad dunay permit apan nitaak sa dili rota niini, tangtangan gihapon og side car kung madakpan.

Nasayran nga nagkadaghan karon ang mga traysikad driver ang nangreklamo batok sa bag-ong ordinansa sa siyudad nga gipatuman sa Citom.

Alang kanila, susama ra nga sila gitangtangan og kapanginabuhian sa gihimo sa kagamhanan sa dakbayan paggukod sa mga traysikad partikular na ang ang mga traysikad driver gikan sa San Nicolas, Pasil, Ermita, Sawang Calero ug uban pa.

Apan gipasabot ni Tancinco nga sila walay mahimo niini tungod kay igo ra nilang gipatuman ang gireklamong ordinansa.

Nalatid sa ordinansa nga ang mga traysikad nga madakpan sa Citom tangtangan og side car ug dili na iuli ngadto sa driver o sa tag-iya niini.

Samtang napatik usab sa ordinansa nga iuli lang sa Citom ang bisiklita ngadto sa tag-iya o sa driver niini kung kini lukaton og P500.Nasayran hinuon nga ang kagamhanan sa dakbayan mihimo na og lakang pag-ila sa mga dalan nga tugutang makabiyahe ang mga traysikad.

Apan gitataw ni Tancinco nga samtang dili pa maamendahan ang ordinansa, padayon gihapon silang manakop sa mga traysikad. – BANAT NEWS