'Task Force Motorsiklo' sa CCPO pasidunggan

CEBU, Philippines – Ang mga sakop sa “Task Force Motorsiklo” sa Cebu City Police Office (CCPO) gipasidunggan sa Police Regional Office (PRO-7) gumikan sa ilang way puas nga kampanya sa kriminalidad dinhi sa dakbayan.

Kini maoy gipahibalo ni Sr. Supt. Patrocinio Comendador, director sa kapulisan sa dakbayan sa Sugbu human nakita sa kadagkuan sa PRO-7 ang kadasig ug kakugi sa “Task Force Motorsiklo” sa CCPO.

Nga hangtud karon way pagkaluyang mihimo sa ilang trabaho pag-roving sa kadalanan sa dakbayan, pagpahigayon og checkpoints sa ingon mapugngan ingon man madakpan ang mga kriminal nga naglaraw pamiktima.

Giklaro niini nga ang Task Force Motorsiklo sa CCPO nagpabilin kining aktibo sa kampanya batok sa krimen sukad sa paglusad niini ikumparar sa ubang units sa kapulisan sa Central Visayas.

Gibutyag niini nga epektibo ang maong organisasyon sa kapulisan gumikan kay makita ang maong grupo nga magbahis-bahis sa kadalanan ug ang mga kriminal dili makadali-dali sa paghimo’g dautan. – Guam Logroño (BANAT NEWS)