Nahiubos nga di maoperahan naghikog

CEBU, Philippines – Tungod sa kahiubos sa iyang anak nga wala magpadala og kwarta giingong naghikog ang usa ka amahan sulod sa ilang panimalay sa sitio Ipil-Ipil barangay Basak San Nicolas pasado alas 10 sa miaging gabii.

Si Celerino Abanes Soque, 67, residente sa nahisgutang lugar napalgang duna nay hikot sa iyang liog nga nagbitay gikan sa kisame.

Sa pakisusi sa Cebu City Police Office Homicide Section sa panimalay ni Soque ila pa kining naabtan nga nagbitay sulod sa ilang panimalay nga dunay pising may gitas-on nga 34 pulgadas. Ang kapolisan nga misusi sa lawas niini walay nakitang timailhang dunay foul play sa kamatayon niini.

Saysay pa sa anak niini nga si Leah human siya nakig-estorya sa mga silingan ug higala miuli siya sa ilang panimalay aron mopahuway apan sa pagsulod niya sa ilang balay maoy misugat kaniya ang patay’ng lawas sa iyang amahan nga nagbitay.

Matud pa sa batan-on ngadto sa kapolisan nga naguol ang iyang amahan nga napakyas ang iyang maguwang tua nagtrabaho gawas sa nasud nga makapadala og kwartang gamiton alang sa operasyon sa giantos niining cataract sa mata. – Lesley Caminade (BANAT NEWS)