60-anyos natagak sa pangpang patay

CEBU, Philippines – Patay nang napalgan ang usa ka 60-anyos nga mag-uuma human kini gituohang aksidenteng natagak sa gibana-banang 20 ngadto sa 30 ka tiil nga pangpang samtang naglakaw nga hubog paingon na untang mopauli sa barangay Colase lungsod sa Samboan niadtong Biyernes sa alas 9:00 sa buntag.

Ang patay nang nakit-an nga naglutaw lutaw na sa sapa mao si Hipolito Godis Castro, 60, molupyo sa nahisgutang lugar ug usa ka mag-uuma.

Matud pa ni POI Sepjanrey Roda sa Samboan Police dihang nahinabi sa Banat News, niadtong adlaw’ng Huwebes gi-imbitar og birthday party ang biktima sa amigo niini sa silingang barangay sa Dalahikan ug gipatabang og ihaw sa baboy ug pagkahuman nakig-inom sa mga barkada.

Nianang pagka-gabii sa maong adlaw nananghid kining mopauli na human usab gihulagway kini nga hubog na niadtong higayuna.

Sumala pa sa kapulisan ngitngit kaayo ang agianang gisubay sa biktima niadtong tungura ug samtang naglakaw na kini pauli aksidente kining natagak sa lawom nga pangpang sa utlanan sa barangay Colase ug Dalahikan nga ang ubos dunay sapa.

Apan nianang pagkabuntag na sa Biyernes kini nakit-an sa mga tawo nga mangaligo unta sa maong sapa nga naglutaw na ug wala nay kinabuhi.

Ang asawa ug mga anak sa biktima nga daling napahibalo sa hitabo wala na modala pa kaniya sa tambalanan human matinong patay na gyud kini ug gidala nalang sa ilang pinuy-anan.

Ang mga kabanay buot nga ipaubos sa autopsy ang patay’ng lawas niini aron masayran kun wala bay foul play sa kamatayon sa biktima.

Nasuta sab sa gihimong pakisusi sa kapulisan nga nalumping ang ulo sa biktima, gituohang nauna og kaugbok ang ulo niini atol sa pagkatagak sa maong pangpang nga gituohang didto motugpa sa bato. – BANAT NEWS