Electrician imbistigahunon

CEBU, Philippines - Walo ka electrician sa General Services Office (GSO) usa niini regular nga kawani sa city hall sa dakbayan sa Talisay ang imbestigahunon niining pagkawagtang sa wire sa kuryente nga balor og P300 mil gikan sa bodega sa GSO.

Si Joan Vebar, hepe sa GSO mibutyag sa Banat News kagahapon nga ang maong mga wire napalit sa siyudad duha na ka tuig ang milabay nga maoy gamiton kung dunay ipahigayong trade fair diha sa south coastal road habig sa city hall.

Apan matud pa ni Vebar nga nakurat sila dihang nasayran nila nga nawagtang na kini diha sa bodega nga hiposanan niini , apan wala pa masuta ang hingpit nga gitas-on sa nawagtang.

Ang hingtungdang walo ka electrician posibleng mataktak sa ilang trabaho kung mapamatud-an nga duna sila'y kalambigitan sa pagkawagtang sa wire.

Si Vebar miingon nga mao kini hisgutanan sa panagtagbo nga himoon nila ni city administrator Richel Bacaltos karong umaabot nga Lunes. -  BANAT NEWS