Tulisang tomboy ug kauban nadakpan

CEBU, Philippines - Usa ka tomboy ug lalaking kauban nga giingong nanulis sa usa ka kawaning babaye sa Philippine Export Processing Zone (PEZA) ang nadakpan sa kapolisang nagpatrolya sa dalan M.L. Quezon, Pusok, dakbayan sa Lapulapu.

Ang nadakpan mao si Irish Castillo, 18, ug Jesson Gabriel, 23, pulos lumolupyo sa barangay Pusok, dakbayan sa Lapulapu.

Ang duha nasigpatan nila ni Inspector Cesar Misola ug mga kauban sa mobile patrol group sa kapolisan sa maong dakbayan sa ilang pagpatrolya sa maong lugar sa miaging gabii samtang nangikyas.

Si PO2 John Ricafort sa kapolisan sa maong dakbayan dihang nahinabi sa Banat News miingon nga naglakaw lang ang biktima sa maong dapit paingon sa PEZA dihang kalit gitionan sa mga suspetsado og kalibre .22 dungan ang pagdeklarar og tulis.

Nakuha sa mga suspetsado ang shoulder bag sa biktima nga gisudlan sa cellphone, salapi nga P5,000 ug mga makeup kit sa biktima nga na-recover ra usab sa mga polis.

Ang team ni Insp. Misola sa mobile patrol group nga maoy nadangpan sa biktima daling migukod sa duha nga miresulta sa pagkasikop niini ug pagkabawi sa kabtangan sa biktima ug ang armas nga puno sa bala. -  BANAT NEWS