Soc giawhag coastal road pasug-an

CEBU, Philippines - Gipalabang na sa mga magbabalaod sa lalawigan ang usa ka resolusyon nga nag-awhag kang Mayor Socrates Fernandez sa dakbayan sa Talisay nga pasug-an ang south coastal road (SCR) diin tulisa ug patya si Padre Jovencio Rabusa.

Sila si Provincial Board member Juan Bolo ug Julian Daan nagkanayon nga dili angayang magmika ang mga opisyal sa Talisay karong namatyan na gyud og inilang tawo sa katilingban ang lugar nga dugay nang naglugitom sa kangitngit matag gabii.

 Matud pa ni Bolo ug Daan nga dili tingale unta maamong ang kinabuhi ni Padre Rabusa niadtong Lunes sa gabii kun hayag pa ang SCR nga habig sa Cansojong.

Alang sa duha ka magbabalaod sa lalawigan nga pulos taga Talisay nga dili na angayang masubli pa ang maong panghitabo ug kinahanglang kaestalaran dayon og suga aron makabaton og kahayag ang maong lugar.

 Alang kang Bolo ug Daan dili na kinahanglang magbinasulay pa ang mga opisyal sa Talisay kun nganong wala masug-i ang maong lugar hangtod karon.

 Samtang gipahibawo ni Bolo nga midayeg siya sa kaabtik sa kapolisan sa Talisay nga gipangulohan sa hepe niini nga si Supt. Henry Biñas sa pagsikop dayon sa mga kriminal nga mitulis ug mipusil patay kang Padre Rabusa.

 Gawas sa pasidungog nga ihatag ni Police Regional Office (PRO-7) Regional Director, Chief Supt. Lani-o Nerez sa umaabot nga Lunes, si Bolo may iduso usab nga resulosyon sa paghatag og commendation ngadto kang Supt. Biñas ug sa iyang mga kaubanang polis nga maoy responsable sa pagsikop sa upat ka mga suspetsado. -  BANAT NEWS