Ika-24 anibersaryo pagsignit sa pari gihinumduman

CEBU, Philippines - Mipahigayon og lihok protesta ang gamay'ng pundok sa mga militanteng grupo sa Sugbo atubangang bahin sa buhatan sa Police Regional Office (PRO-7) kagahapong adlawa agi og paghandom sa ika-24 ka tuig nga kasumaran sa pagdagit ug pagpatay ni Fr. Rudy Romano.

Dili momenus 50 ka mga sakop sa Bayan Muna Central Visayas ug Karapatan Central Visayas ang misalmot sa maong protesta nga padayong nanawagan og hustisya sa kamatayon sa pari nga nagsilbing vice chairman sa Karapatan niadtong higayuna.

Si Paul Rodriguez sa Bayan Muna Central Visayas mibutyag sa Banat News nga bisan og hanap na kaayo ang ilang gipanawagan nga hustisya sa kamatayon ni Fr. Romano apan wala sila maluya ug dili sila mohunong hangtud nga ilang makita ang bisan reporma nalang sa kasamtangan karung pang-gobiyerno.

Ang mga militanteng pundok nagdagkot og kandila sa gate sa gawas nga bahin sa PRO-7 aron pagpadayag sa ilang kahigwaos sa kalangay sa hustisya sa kabanay sa namatay nga pari.

Si Rodriguez mipasabot nga gituyo nila nga ang buhatan sa PRO-7 maoy pahigayunan sa protesta human ilahang gikonsiderar ang PNP nga maoy instrumento sa misteryosong pagkahanaw sa pari nga gituohan nilang gipatay na sulod sa milabay nang 24 ka tuig.

Nunot niini, gisaway ni Rodriguez ang padayong pagsaka sa gidaghanon sa political killings ubos niini karung administrasyon ni Presidente Gloria Arroyo og gisaway sab niya ang kapulisan ug militar nga nagmika lang ug walay gihimong aksyon pagsulbad niini. -  BANAT NEWS