Proyekto, lote sa Kapitolyo sa Naga susihon sa Ombudsman kay may reklamo

CEBU, Philippines - Mipasalig si Assistant Ombudsman Virginia Palanca Santiago nga mopahigayon og imbestigasyon labot na sa kontrobersiyal nga 100 milyones pesos nga 25 ka hektaryang luna sa Balili beach sa lungsod sa Naga nga gipalit sa probinsiya sa Sugbu aron maoy labayan og tambakan sa coal ash gikan sa Korean Electric Power Corporation kon KEPCO.Matud pa ni Santiago nga ang iyang buhatan mopahigayon na og evaluation sa maong kontrobersiya human usab nakaduso na og sumbong ang mga environmentalist dinhi sa Sugbu nga gipanguluhan ni Atty. Dante Ramos.

Si Santiago miingon nga iyang tan-awon ang reklamo ni Atty. Ramos nga giduso sa ilang buhatan niadtong Huwebes sa hapon lakip na ang kopya sa Memorandum of Agreement nga gipirmahan sa mga opisyales ni Governor Gwendolyn Garcia sa kagamhanan sa lalawigan ug sa KEPCO.Si Santiago miingon nga ang iyang buhatan mopahigayon dayon og fact finding investigation alang sa pagkuha og dugang pang mga ebidensiya kun may iregularidad ba gyud ang pagpalit niini ug planong proyektong tukuron.

Gipasabot usab ni Santiago nga ang mga kaso sa ilang buhatan dili makadalidali sa pagresulbar sa mga kaso nga nag-ung-ong sa ilang buhatan tungod sa kakulang sa ilang mga sakop sa fact finding division.Apan iyang gitataw nga temporaryo lamang kini tungod kay may gikuha silang mga items gikan sa Ilo-ilo city, may gi-interview na usab silang mga abogado alang sa paghulip sa nabakante sa maong division.Gawas pa niini, si Santiago miingon usab nga nihinay og diyutay ang pag-imbestigar sa mga kaso sa ilang buhatan kay gawas sa kakulang sa mga imbestigador ubay-ubay usab sila nga giatiman nga mga caravan ug uban pang mga proyekto. -  BANAT NEWS