Piniriso gipusil sa jail guard

CEBU, Philippines – Nabuslot ang tiyan sa usa ka piniriso human milapos ang bala gikan sa iyang likod sa dihang gipusil sa gwardiya sa Cebu City Operations Second Chance Center human mosuway og eskapo sa Cebu City Jail niadtong Miyerkules sa alas 9:00 sa gabii diha sa barangay Kalunasan.

Ang napusilan ug nadakpan pagbalik mao si Arnel Saladaga, 25, taga Suba-Pasil ning dakbayan nag-atubang sa kasong paghupot sa illegal nga drogas ingon man illegal possession of firearm.

Si Insp. Richard Laure ang Deputy Jail Warden sa Cebu City Jail nga gikahinabi sa Banat News nagkanayon nga mipahigayon unta'g head count ang ilang mga jailer niadtong higayuna human sa duwa sa basketball sa mga piniriso.

Apan kalit lang nidagan si Saladaga dihang nakabantay nga abli ang compound sa gipahigayong basketball ug gilangkat niini ang barbed wire sa secondary fence duol sa kapilya ngadto sa perimeter fence sa CCOSCC.

Gikatahong si JO1 Eric Anguit sa CCOSCC mipabuto pa’g warning shot makaduha ka higayon sa iyang service firearm nga .45 aron mohunong si Saladaga apan wala gyud kini mopatuo hinungdan nga gipusil kini dihang nakagawas na sa bilanggoan ug maayong pagkaigo sa buko-buko nga nilapos sa tiyan.

Matud pa ni Laure bisan giunsa pa sa pag-warning si Saladaga wala gyud kini patuo ni JO1 Rodante Galia nga didto sa usa sa mga tower 5 hinungdan nga si JO1 Anguit naka-desisyon sa pagpusil kaniya.

Gibutyag niini nga ila gihapong ipaubos sa imbestigasyon sila si JO1 Galia ug mga jail guard nga naka-duty sa City Jail niadtong Miyerkules sa gabii isip kabahin sa ilang proseso. – Guam Logroño (BANAT NEWS)