CEBU, Philippines – Usa ka wala mailhing lalaki nga napuno sa bun-og ang kalawasan ang nakit-ang patay diha sa eskina sa Osmeña Boulevard ug F. Gonzales Street barangay Sto. Niño pasado alas singko sa miaging adlaw.
Ang maong lalaki gibana-banang nagpangidaron og 40 hangtud 50- anyos samtang may gitas-ong 5”4 ngadto 5”5 ug nagsuot kini og maong nga blue short pants ug lalag nga t-shirt nga adunay printang pula.
Sa imbestigasyon sa kapolisan nasayran nga ang biktima nagbarog-barog daplin sa dalan sa nahisgutang lugar sa dihang kalit lang nga mipatim-aw ang usa ka wala mailhing lalaki nga adunay dalang kahoy. Way daghang pasumangil gipuspusan makadaghang higayon ang biktima hangtud nga nalup-og ug pagkahuman daling miikyas ang mamumuno.
Ang biktima nga nagkadugo na dihang nakaplagan daling gidala sa Cebu City Medical Center apan nakabsan kini sa kinabuhi nianang pagkagabii. Sa pagkakarun ang kapolisan wala pay mga nadawat nga impormasyon kung si kinsa ang biktima ug lakip na ang motibo pagpatay kaniya. – Lesley Caminade (BANAT NEWS)