Babaye'ng estudyante giluba sa sikyu

CEBU, Philippines – Anaa karon sa kritikal nga kahimtang ang usa ka estudyante sa fourth year sa University of Cebu-Main Campus human kini dunggaba sa usa ka security guard nga bana sa iyang higala sulod sa iyang lawak sa boarding house nga iyang giabangan sa sitio Sto. Niño, barangay Suba, dakbayan sa Sugbo, kagahapon pasado alas 12:00 sa kaadlawon.

Ang biktima mao si Miame Avenido, 19, usa ka BSIT student sa nahisgutang tunghaan, samtang ang suspetsado mao si Narciso Cabataña, 25, nga taga sitio Missionary sa nahisgutang barangay.

Sumala sa kapolisan nga samtang nahinanok ang biktima sa pagkatulog sulod sa iyang lawak nahigmata siya sa dihang nakabantay siya nga may tawo nga nakasulod. Unya nasuta niya nga si Cabatana kinsa bana sa kauban niyang tighigdaan usahay sa iyang lawak maoy misulod sa iyang kuwarto.

Gumikan sa iyang katahap nga may dautan kining buhaton, nanaog siya sa silong, dihang sa paggawas niya ,gihansakan siya og kalit sa kutsilyo niini.

Giusban pa gyud siya og panunggab ug nakagawas siya pahilayo sa iyang lawak nga nabulit sa samad dinunggaban ang iyang lawas ug maayo nalang kay wala na siya sundi sa suspetsado.

Ang biktima gihatod dayon sa iyang mga kauban sa tambalanan samtang ang suspetsado gipangita pa karon sa kapolisan human kini makaikyas. – Lesley Caminade (BANAT NEWS)