CEBU, Philippines – Duha sa tulo ka suspek nga mitulis ug mipatay kang Padre Jovencio Rabusa nasikop sa kapolisan sa dakbayan sa Talisay didto sa maong dakbayan kagahapon sa buntag.
Usa sa mga suspetsado kinsa usa ka menor de edad boluntaryong mitahan ngadto sa kapolisan ug miila sa kauban niyang si Roselo Ravanes, 28, nga maoy mipusil patay kang Padre Rabusa.
Si Johny (dili tinuod niyang ngalan) 15, human motahan sa kapolisan mibutyag usab nga ang ikatulo niyang kauban sa maong krimen, iya lang giila nga si “Tingloy” kinsa nakasibat dayon pauli ngadto sa Camotes island nga maoy iyang pinuy-anan.
Si Tingloy matud pa ni Johny maoy utok ug nagplano sa maong pagpanulis.
Samtang si Ravanes kinsa taga Cansojong sa maong dakbayan miangkon nga siya gyuy mipusil patay kang Padre Rabusa kay wala siya masayod nga usa kini ka pari.
Si Ravanes kinsa didto hidakpi sa kapolisan sa barangay Tangke giingong kainom ni Tingloy didto sa sitio Ibabao sa south coastal road habig sa Cansojong dihang nakita nila si Padre Rabusa nga naglakaw sa maong lugar niadtong Lunes sa gabii.
Sa pagtuo nga kuwartahan kay maayo man og pamarog, gipangayo dayon nila ang cellphone niini ug dihang misuki ang pari gipusil dayon ni Ravanes.
Ang tukmang kiha batok sa tulo ka suspetsado ipasaka na sa kapolisan sa Talisay karong adlawa.
Samtang ang maong hitabo maoy nag-una sa mga butang nga gihisgotan sa mga miyembro sa Regional Peace and Order Council (RPOC-7) sa ilang panagtagbo kagahapon didto sa Kapitolyo.
Matud pa ni Regional Police Office-7 Director Lani O Nerez nga mapasigarbuhon kaayo niyang gibutyag ang kadali nga nasulbad sa pagpusil patay kang Padre Rabusa tungod sa kaabtik nga gipakita sa kapolisan sa dakbayan sa Talisay.
Gani may giandam na siyang pasidungog alang kang Supt. Henry Beñas, ang hepe sa kapolisan sa Talisay ug kang Sr. Supt, Jesus Gacquing ang Director sa Cebu Provincial Police Office
Sa bahin sa kaparian sa Sugbo gikahinangop kaayo nila ang pagkasikop sa mga mipatay kang Padre Rabusa.
Matud pa ni Msgr, Achilles Dakay ang liaison officer sa archdiocese sa Sugbo nga iyang gipanghinaot nga ang dali nga kasulbaran sa kamatayon ni Padre Rabusa maoy mahimong sinugdanan sa kasulbaran usab sa mga krimen dinhi sa Sugbo nga wala gayud masulbad hangtod sa pagkakaron
Miingon si Dakay nga napahibawo na niya si Cardinal Ricardo Vidal kinsa kasamtangang tua sa Manila nga mitambong sa komperensya sa Catholic Bishop Conference of the Philippines nga gituohan niyang nalipay niining bag-ong kaugmaran.
Ingon usab niini ang gibutyag ni Msgr. Esteban Binghay ang Episcopal Vicar kinsa midayeg usab sa kaabtik nga gipakita sa kapolisan sa Talisay sa pagsulbad sa kamatayon ni Padre Rabusa.
Matud pa ni Binghay nga angayan lamang nga pahamtangan og bug-at nga silot ang mga kriminal nga mipatay kang Padre Rabusa.
Sa laing bahin giandam nang daan ni Sr. Supt. Gacquing ang kapolisang mobantay sa lubong ni Padre Rabusa didto sa lungsod sa Badian karong sunod semana.
Ang frontliner sa maong lubong mao ang taga Badian Police Station, apan ang kapolisan sa lalawigan gitahasan sa pagsiguro sa kaluwasan sa tanang igsoon, paryente , kahigalaan ug mga kaparian nga mobiyahe tali sa dakbayan sa Sugbo ug sa lungsod sa Badian alang sa maong lubong. - Uban sa report nila ni Chester Abadilla, Guam Logroño, Darrel Carumba ug Rey Pasaporte (BANAT NEWS)