Pamomba gibantayan sa kapolisan

CEBU, Philippines – Ang mga kadagkuan sa Police Regional Office (PRO-7) mimando sa mga city ug provincial director sa kapolisan nga magbinantayon ug mopalig-on sa pagbantay sa seguridad sa ilang tagsatagsa ka hurisdiksyon nunot   ning sunod-sunod nga pagpamomba sa Mindanao.

Matud pa ni Sr. Supt. Louie Oppus, sa Regional Operations and Plans Division sa PRO-7 nga kinahanglang mga hepe sa kapolisan sa kalungsoran ug mga dakbayan igmat ug abtik sa pagsanta sa mga dautang elemento.

Apan matud pa niya nga kinahanglang ang mga hepe sa kapolisan sa tibuok Central Visayas makigsuod sa mga molupyo sa komunidad kay dako kaayo kini og ikatabang sa pagpaniid sa mga dautang tawo, ilabi na ang mga tulisan.

Hinuon miingon si Oppus nga mapasalamaton sila sa katawhan dinhi sa Sugbu gumikan kay mitabang kini sa pagbantay sa kalinaw ug kahusay sa palibot samtang ang simbahan mipakatap usab og Parish Security Group (PSG) nga moabag sa pagbantay sa seguridad diha sa mga simbahan

Gipasalig ni Oppus sa mga molupyo dinhi sa Central Visayas nga dili gyud mahitabo ang mga pagpamomba dinhi sa palibot tungod kay mabinantayon usab ang matag usa pinaagi sa pagpahibawo dayon sa kapolisan sa mga butang nga ilang kabalak-an.

Midugang siya nga sa matag karon ug unya gipangandaman pag-ayo sa kapolisan ang mga posibleng mahitabo dinhi sa Kabisay-an sama sa nahitabo sa Mindanao. – BANAT NEWS