3 ka tulisang mipatay sa pari ilhan

CEBU, Philippines – Nailhan na sa kapolisan ang tulo ka mga tulisang maoy gitumbok nga mitulis ug mipatay sa pari sa lungsod sa Naga nga si Padre Jovencio Rabusa niadtong Lunes sa gabii diha sa south coastal road habig sa barangay Cansojong, dakbayan sa Talisay.

Narekober usab sa kapolisan ang mga gamit sa biktima lakip na ang cellphone nga una nang gikareport nga maoy gikuha sa mga tulisan.

Usa sa mga suspek ang giila sa kapolisan nga mao si Reynaldo Baguio, 22-anyos alyas “Hapon” residente sa lugar kinsa nagtago-tago na karon human gituohang nakaikyas sa hot pursuit operation diha sa ilang balay kagahapon sa buntag dihang misiyagit ang iyang inahan.

Ang inahan sa suspek giilang si Lucita,50, gidakop og apil sa mga polis tungod kay human mosiyagit nga dunay mga polis nakit-an usab kini sa mga operatiba nga nagdali-dali og labay og butang gawas sa ilang balay nga dihang gihiling mga shabu paraphernalia diay ang sulod niini.

Kahinumduman nga si Padre Rabusa ang gikan sa Naga ug pag-abot diha sa barangay Tabunok, dakbayan sa Talisay misakay kini og traysikol ug nanaog diha sa eskina sa Carmen Ville barangay Poblacion naglakaw paingon ngadto sa balay sa iyang igsuon sa Sacred Heart Village diha sa nahisgutang barangay.

Giingong dunay nakasakay nga menor de edad si Padre Rabusa sa maong traysikol ug naatol usab nga nagdungan sila og panganaog niadtong tungura.

Base sa imbestigasyon sa kapolisan nga ang tulo ka tulisan kalit lang miduol kang Padre Rabusa ug miingon nga “ihatag lang ang gikinahanglan namo” ug dayon usa kanila walay pagduha-duhang mipusil sa pari.

Ang menor nga kuyog sa pari tungod sa kahadlok mikaratel og dagan pahilayo sa mga tulisan.

Si Padre Rabusa nakaangkon og duha ka samad pinusilan sa iyang buko-buko ug usa sa walang bukton ug wala na makaabot nga buhi sa tambalanan.

Ang hepe sa Talisay City Police Station nga si Supt. Henry Biñas sa pakighinabi sa mga tigbalita misaad nga di sila mohunong hangtud di masikop ang tulo.

Kagahapon sa buntag ang bag ni Padre Rabusa ang nakit-an ni Ryan Juanario, 22-anyos residente sa maong lugar diha sa kasagingan likod sa Shell Station samtang nanugway og kanding.

Matud ni Juanario nga ang cellphone sa pari nabuwag na gikan sa bag ug sa iyang katahap nga kang Padre Rabusa gyud kadto mitawag siya sa kapolisan.

Sulod sa maong bag ang personal nga gamit sa pari lakip na ang tamdanan niini sa misa, gituohang nahadlok nga gabaan ang mga tulisan pagkasayod nga pari diay ang ilang gibiktima maong gilabay ang bag.

Si PO3 Arnold Damasco kinsa usa sa mga operatiba nga nangita sa mga tulisan mibutyag sa Banat News nga nakadawat sila og impormasyong miuli sa ilaha ang suspek hinungdan nga ilaha kining gisusi, apan ang inahan sa suspek giingong misinggit nga naay mga polis ug gituohang nakapaalarma sa suspek ug nakasibat.

Si Lucita sa pakighinabi niini sa Banat News kagahapon mihimakak sa mga pasangil batok kaniya ug sa iyang anak ug matud niini nga niadto pang buwan sa Disyembre sa milabay’ng tuig mibiya ang iyang anak sa ilang balay. – BANAT NEWS