Capitol wala apektohi sa mando ni Mayor Tomas

CEBU, Philippines – Wala maapektohi ang kagamhanan sa lalawigan sa Sugbu sa bag-ong pamaagi nga gipatuman ni Mayor Tomas Osmeña sa dakbayan sa Sugbu nga dili padawaton ang Cebu City Medical Center (CCMC) og pasyente nga dili taga siyudad sa Sugbu.

Si Provincial Integrated Health Officer, Dr. Cristina Diango miingon nga wala sila mabalaka  niini kay naanad na sila sa kinaiya ni Mayor Osmeña.

Matud pa ni Diango nga sa wala pa imando sa mayor ang   maong polisiya wala magsalig ang mga pasyente sa kalungsoran nianang CCMC.

Kini tungod kay aduna may walo ka mga district hospital ang kagamhanan sa probinsiya nga kompleto sa mga pasilidad sa pag-atiman sa mga may sakit gikan sa nagkadaiyang bahin sa lalawigan.

Gipasabot ni Diango nga kun ang usa ka pasyente dili na matabang sa kahimanan sa usa ka district hospital may kadangpan pa kini nga mao ang Vicente Sotto Memorial Medical Center nga mas sangkap pa sa mga medical equipment itandi sa CCMC.

Midugang si Diango nga bisan sa wala pa ang maong baod ni Osmeña, si Gobernador  Gwendolyn Garcia daan nang nagmando sa iyang buhatan ug sa nagdumala sa mga district hospital nga atimanon gyud pag-ayo ang mga masakiton nga ma-admit sa mga tambalanan sa ilang lugar.

Sa pagkatinuod mas kompleto pa ang mga hospital sa kalungsoran kay sa CCMC ilabi na kun ang hisgutan mao ang mga kahimanan bahin sa A (H1N1) virus sama sa isolation room ug uban pa, matud pa sa gobernador. – Chester Abadilla (BANAT NEWS)