Mag-uyab gipusil angol

CEBU, Philippines – Manag-uyab gipusil sa wala mailhing lalaki gawas sa panimalay sa babaye sa Upper Linao syudad sa Talisay pasado alas 10 sa miaging gabii usa kanila ang naangol.

Ang manag-uyab nailhan nga sila Soliel Caumeran ug Maurize Lozaga pulos 22 ang panuigon samtang ang mamumuno wala pa mailhi sa kapolisan.

Sa imbestigasyon sa kapolisan sa syudad sa Talisay nasayran nga ang duruha diha sa gawas sa ilang panimalay dihang kalit miabot ang maong lalaki ug mipusil kanila.

Giingong sa wala pa mahitabo ang pagpamusil si Caumeran adunay nabantayang lalaking nagsige og balik-balik og lakaw atubangan sa ilang panimalay apan wala lang nila kini panumbalinga.

Si Caumeran naigo sa tuong bahin sa iyang kamot.

Matud pa ni PO2 Lino Diez sa Talisay City Police station sa pakighinabi sa Banat News nagkanayon nga posibleng pagpangawat ang tuyo sa maong tawo tungod sa rason nga gusto na kining mosulod sa ilang panimalay apan gumikan kay nagmata pa ang duha nasagmuyo kini.

Ang duruha mibutyag nga nakaila sa nawong sa maong lalaki ug nakabantay usab silang duna kini nagpaabot nga kaubang lalaki sa ngitngit nga bahin sa maong lugar. – Lesley Caminade (BANAT NEWS)