LBC pabantayan pag-ayo

CEBU, Philippines – Ang pangulo sa kapulisan sa dakbayan sa Sugbu Sr. Supt. Patrocinio Comendador mimandong higpitan pa ang pagbantay sa tanang sanga sa LBC Hari ng Padala nga nahimutang ning dakbayan.

Kini human sa nahitabong pagpanulis kagahapon sa usa ka branch sa maong negosyo diha sa MC Briones Highway Seno dakbayan sa Mandaue diin usa ka kawani ang gipatay.

Kini tungod kay nagduda siyang ang mga tulisan nga nitulis sa LBC sa dakbayan sa Mandaue usa ra ka grupo sa mga tulisan nga nanulis dinhi sa LBC sa dakbayan niadtong miaging tuig.

Matud pa niini nga ang pattern sa mga tulisang nanulis sa LBC Mandaue susama lang og pattern sa mga tulisan nga nanulis sa LBC dinhi sa dakbayan, kini ilaha nang nadakpan kaniadto ug napasakaan og kaso.

Hinuon wala pa sila’y nadawat nga report nga adunay grupo sa mga tulisan nga nakasulod dinhi sa dakbayan sa Sugbu apan aron pagsiguro nga mapugngan ang mga tulisan gipalihok na nila karon ang iyang mga sakop pinaagi sa pag-monitor. – Guam Logroño (BANAT NEWS)