Tulo nakuryentihan

CEBU, Philippines – Tulo ka miyembro sa pamilya nangalandig sa tambalanan human nakuryentihan sa hayhayan sa ilang panimalay niadtong Domingo sa buntag sa sitio Conception barangay Panugnawan lungsod sa Medellin.

Nakaangkon og daghang mga paso sa nagkadaiyang parte sa lawas ang mga biktimang sila si Litlit Sumabong, Roque Sumabong, 72, apuhan ug Jose Sumabong, 50, pulos nagpuyo sa nahisgutang lugar.

Usa ka Ronilo Monterde nga lineman sa Cebeco II maoy mi-report sa kapulisan labot na sa maong insidente.

Si Monterde mibutyag sa kapulisan nga atol sa ilang pagsusi sa nahisgutang dapit ilang nahibaw-an nga illegal nga nikubit sa linya sa kuryente ang panimalay sa mga Sumabong.

Sa imbestigasyon sa kapulisan nasuta nga nanghayhay sa mga nilabhang sapot si Litlit sa wire nga hayhayan apan wala kini makabantay nga adunay live nga linya sa kuryente nga nasaghid sa hayhayan hinungdan nga kini nakuryentihan.

Ang apuhan nga si Roque pagkakita sa nahitabo dali untang mitabang kaniya ug misunod dayon si Jose apan sila na hinuong tulo ang nakuryentihan.

Swerte nalang nga nakabuhi silang tulo sa maong hayhayan apan nakaangkon gyud og mga paso sa ilang mga lawas.

Human sa panghitabo ang mga biktima daling gidala sa ilang mga kabanay sa Severo Verallo Hospital diha sa lungsod sa Bogo ug gibalhin sa tambalanan dinhi sa dakbayan sa Sugbu. – BANAT NEWS