Prayer rally vs. anti-life bill himuon

CEBU, Philippines – Mopahigayon na usab og prayer rally dinhi sa dakbayan sa Sugbu ang mga pro-life advocates batok sa duha ka kontrobersyal nga balaudnong gihulagway nilang anti-life ug di maka-Ginoo.

Matud pa sa country director sa Human Life International (HLI) nga si Rene Josef Bullecer usa ka prayer march for life ang gitakda nilang himuon karong Hulyo 25.

Kini maoy katapusan nilang hunat sa dili pa mopalanog si Presidente Gloria Macapagal-Arroyo sa iyang State of the Nation Address (SONA) sa pagbukas sa ikatulong regular session sa ika-katorse nga Kongreso karong Hulyo 27.

Matud pa ni Bullecer nga molanat og upat ka oras ang ilang kalihukan nga nagagikan sa upat ka converging points ug mag-abot sa Fuente Osmeña Rotunda.

Nagkanayon siya nga subli nilang ipalanog ang ilang hugot nga pagsupak sa Reproductive Health Bill ingon man sa Gay Rights Bill. Kini human usab makakuha og kasayuran ang mga pro-life group nga ang nahisgutang mga balaudnon subling iduso sa mga proponent niini atol sa pagbukas sa kongreso.

Gibana-bana ni Bullecer nga salmutan sa libuan ka mga pro-life advocates ang ilang ipahigayong prayer march for life nga tambungan usab ni Archbishop Ricardo Cardinal Vidal.

Taliwa niini padayon gihapong nanawagan ang grupo sa mga Sugbuanon nga mouban sa ilang adbokasiya.

“Gi-invite nato ang tanan gyud nga nitoo sa gibarugan sa simbahan nga moduyog sa atong kalihukan ilabi na tong mga politicians,” sumala ni Bullecer. Hugot nga gisupak sa mga pro-life group ang nahisgutang duha ka balaudnon tungod kay kini giingong dako nga kalapasan sa pagtulun-an sa simbahan.

Ang Reproductive Health Bill gituuhan nga maghatag og agianan sa abortion samtang ang Gay Rights Bill maghatag usab og dalan sa same sex marriages. – Elly Bolonos (BANAT NEWS)