Tungod sa pamomba seguridad lig-onon

CEBU, Philippines – Gumikan sa mga pagpamombang nahitabo sa Mindanao mas gipalig-on og maayo sa kapulisan sa lalawigan ang gipatumang seguridad aron pagsigurong luwas ang publiko.

Sa miaging adlaw, lima ka tawo ang namatay samtang kapin 30 ang naangol human moulbo ang usa ka bomba diha sa Cotabato City nga gituohang mga sakop sa Moro Islamic Liberation Front aron pag-divert sa atensyon sa militar tungod sa subling kagubot sa MILF ug gobiyerno. 

Ang pangulo sa kapulisan sa lalawigan sa Sugbu, Sr. Supt. Jesus Gacquing nagkanayon nga gimanduan na niya ang iyang mga chief of police sa kalungsuran ug component cities atol sa ilang command conference niadtong Sabado.

Matud pa niini nga ang ilang counter-insurgency, counter terrorists activity ug uban pang lakang pagpaniid gipahugtan pinaagi sa pagpahigayon og mga checkpoints sulod sa 24 oras.

Alang kaniya ang police visibility sa kalungsuran dako kaayo’g ikatabang sa ilang pagpatunhay sa kahapsay ug kalinaw epektibo kaayong mapugngan ang bisan unsang mga laraw sa mga dautang elemento.

Si Sr.Supt. Patrocinio Comendador sa Cebu City Police Office mimando usab sa mga sakop nga pahugtan gyud ang ilang pagpaniid niadtong mga tawong kadudahan ang linihukan.

Hinuon ang kapolisan makig-alayon sa Muslim community sa lalawigan aron motabang pagmentinar sa kahapsay ug kalinaw inabagan sa lokal nga mga awtoridad.

Samtang makig-alayon usab sila sa kadagkuan sa Cebu Port Authority (CPA) sa Cost Guard alang na sa ilang hiniusang paglantaw sa mga gagmay’ng pantalan. – Guam Logroño (BANAT NEWS)