LBC gitulis; 1 patay

CEBU, Philippines – Patay diha-diha ang usa ka empleyado sa LBC Hari ng Padala human pusila sa makadaghang higayon sa usa sa upat ka tulisang mitulis sa maong establisamento kagahapon sa buntag sa M.C Briones Hi-way Seno dakbayan sa Mandaue.

Ang gipusil ug namatay giila sa kapolisan sa dakbayan sa Mandaue nga mao si Eugenio Agmata, 44, nga taga Cabangcalan sa nahisgutang dakbayan kinsa nakaangkon og duha ka samad pinusilan sa walang dughan ug tiyan gikan sa .45 nga kalibre sa armas sa wala mailhing tulisan.

Subay sa imbestigasyon sa Presinto Uno sa maong dakbayan pinangulohan ni Sr. Insp. Abrahan Ocampo nga nahinabi sa Banat News duha ka motorsiklong pulos dunay usa ka angkas maoy responsable sa maong pagpanulis.

Ang drayber sa duha ka motorsiklo mi-parking sa unahan gibana-banang usa ka gatos ka metros ang gilay-on gikan sa nahimutangan sa LBC.

Matud pa ni SPO4 Arnulfo Quiatchon sa Investigation Detection and Management Bureau usa lang ka tulisan maoy misulod sa LBC ug miduol ngadto sa nahimutangan sa kaherang si Trixia Montero dayong tion og armas deklarar og tulis.

Apan wala pay kwarta nianang tungura ang kahon maong gibunlot sa tulisan si Montero aron kuyogan diin ang ilang vault apan diha luyo naabtan nila ang biktima nga nag-ihap og kwarta gikan pa sa vault niadtong tungura.

Ang tulisan daling mition og armas kang Agmata apan gikatahong misukol ang biktima hinungdan nga gipusil siya sa makadaghang higayon, si Montero misutoy og dagan sa bodega ug nanirado dayong singgit ug tambag kang Agmata sa pag-ingon “ayaw og sukol noy, ihatag lang ang kwarta!”

Ang tulisan daling mipunit sa kwarta giihap sa biktima nga gibana-banang kapin lang sa P2 mil ug daling migawas balik sa nagpaabot nga kauban ug mipasirit sa motorsiklo paingon sa amihanang bahin sa Mandaue.

Usa ka Felipe Gervise, traffic enforcer sa dakbayan sa Mandaue mitug-an kang Sr. Insp. Ocampo human mahitabo ang tulis iyang nasundan ang duha ka motorsiklo nga nagtangag sa plaka GM 2779 nga XRM kolor blue ug kolor pula nga motorsiklong may number 7753 nga gisakyan sa upat ka tulisan nga miliko ilawom sa flyover paingon sa Maguikay.

Human sa maong hitabo ang kauban sa biktima nga kahera gidala usab sa tambalanan gumikan kay na-shock sa tumang kalisang dihang gitionan og armas sa tulisan human pusila ang biktima.

Gihulagway ang tulisan nga mipusil sa biktima nagpangidaron 24 ngadto sa 26 anyos, nagsul-ob og polo shirt nga striped kolor green, maong pants ug nagsul-ob og rubber shoes nga kolor puti.

Sama sa nahaunang LBC establishments nga gitulis wala gihapon silay security guard ug CCTV camera, matud pa sa usa sa mga empleyado sa laing branch sa LBC nga ang ilang CCTV camera “for installation” na kuno.

 Matud ni Sr. Insp. Ocampo naka-deposito na sa bangko niadto pang Sabado sa hapon ang maong establisamento maong P2 mil kapin nalang ang nadala sa mga tulisan.

Nakuha sa crime scene ang tulo ka kabhang tupad sa gihagbaan sa biktima samtang distansya og gamay ang usa ka empty shell sa .45 pistol nga napasok ngadto ilawom sa trash can.

Si Sr. Supt. Orlando Ualat, hepe sa Mandaue City Pilice Office (MCPO) miingon nga atol sa tulis wala pay nagsuroy-suroy nga mga Mobile Patrol sa maong dapit tungod kay nianang orasaha nagpunsisok pa ngadto sa motor-pool aron magpa-gasolina.

Matud ni Ualat nga naandan na gyud unta nga inig ka alas-8 sa buntag diin mangabli ang mga bangko, lending firm ug uban pa, duna nay maglibot-libot nga patrol car apan gumikan sa maong kakulian kagahapon wala gyu’y naka-roving nga patrol car sa lugar. Midugang si Ualat nga dugay na niya kining problemaha gipaabot ngadto sa konseho sa siyudad. – BANAT NEWS