Gipatay kay mireklamong gikawatan

CEBU, Philippines - Tungod sa manok gipatay atubangan sa asawa ug anak ang usa ka mag-uuma diha sa barangay Tangub lungsod sa Pinamungahan sayo sa buntag sa miaging adlaw.

Si Marcelino Alupay, 43, residente sa nahisgutang lugar gipusil ug napatay ni Roque Pacris uban sa iyang mga higalang sila si Carmello Toralba Jr. ug duha ka 16-anyos.

Sa imbestigasyon sa kapolisan sa lungsod sa Pinamungahan nasayran nga sa wala pa mahitabo ang pagpusil-patay sa biktima mikomprontase kang Toralba gumikan sa giingong pagkawat sa naulahi sa manok sa iyang inahan.

Gibaharan niini si Toralba nga iyang ipaabot ngadto sa barangay ang gihimo, apan wala pa gani makaadto sa barangay kapitan ang biktima giapas sa mga suspek ug giingong nag-estoryahay pa.

Apan sa dayon nang biya sa grupo kalit nga gipusil ni Pacris ang biktima nga nagtuk-ong diha sa iyang tugkaran ug naigo sa ubos nga bahin sa tuong abaga nga nakaingon sa kamatayon niini.

Ang kapolisan milusad og hot pursuit operation batok sa upat ug nasikop sila diha sa barangay Santo Rosario inabagan sa mga Cafgu sa lungsod sa Aloguinsan. - Lesley Caminade (BANAT NEWS)