Batang giabuso sa ginikanan mikiha

CEBU, Philippines - Usa ka 13-anyos nga dalagita ang mipasaka og kasong multiple counts of child abuse ug attempted parricide batok sa iyang amahan ug stepmother tungod sa giingong pagmaltrato sa duha kaniya makadaghang higayon sukad nga dinhi na sila magpuyo sa Sugbu niadtong tuig 2007.

 Ang bata ug ang pamilya lumad gyud nga taga Iloilo nagkanayon sa iyang reklamo nga pipila ka bulan human sila mopuyo niadtong Septiyembre sa 2005 diha sa Labangon nagsugod ang pagpanakit kaniya dihang nag-away ang iyang amahan ug stepmother nganong gipaapil siya sa pajama party sa ilang eskuylahan.

Tungod sa namugnang away sa duha sa iyang pagtambong sa party gisilutan siya pinaagi sa pagpahubo sa tanan niyang sapot. Marso 16, 2007 ang biktima nakulatahan sa iyang amahan gumikan sa sumbong sa iyang stepmother nga gitabisan niya kini, wala pa gyud matagbaw giingong gipuspusan siya sa iyang stepmother og tubo.

Human sa pagpamun-og milayas siya ug anha mipuyo sa silingan sa iyang classmate nga nakautang kaniya og salapi apan napalgan siya sa iyang mga ginikanan ug gipapauli ug gisaarang di na mausab ang pagpanakit kaniya.

Apan ang pagpanakit nausban gihapon nianang pagkasunod bulan dihang nadunggan siya sa iyang stepmother nga nakig-estorya sa iyang amahan nga di unta sila magubot kung wala kini maminyo pag-usab, gikatahong gibitad sa iyang stepmother ang iyang buhok, gisagpa sa nawong ug gisukmag ang iyang tiyan, dugang pa sa bata hasta iyang amahan miapil pa og kulata niya hangtud nga siya nakuyapan.

Matud pa sa bata nga dihang nahigmata siya giludhan sa iyang amahan ang iyang tiyan samtang ang iyang stepmother mituok sa iyang liog ug gibubuan siya niini og bugnaw nga tubig hinungdan nga naglisod siya og ginhawa.

Dugang pa sa bata nga diha pay higayon nga giupawan gyud siya sa iyang stepmother ug dihang nabalhin na sila sa Elizabeth Pond sa barangay Camputhaw gibubuan og rugby sa ulo sa iyang stepmother atubangan sa iyang amahan ug gisuwayan pa usab nga paligsan sa ilang awto.

Ang bata mibutyag nga dunay usa ka higayon nga gihuboan siya sa iyang stepmother ug gipadagan tulo ka higayon palibot sa ilang balay ug gibunalan og buckle sa sinturon sa ulo.

Ang bata miangkong dihay usa ka higayon nga nangawat siya og kwarta sa iyang amahan sa tuyo untang molayas balik sa Iloilo apan nasakpan siya sa iyang stepmother ug agi og silot gisugba sa naulahi ang piso ug gipakumkom kaniya hinungdan sa dakong paso diha sa iyang palad.

Ang pagpangabuso sumala pa sa biktima gibuhat kaniya hangtud sa 2008, usa na niini nahitabo niadtong bulan sa Agosto dihang gihiktan sa iyang stepmother ang iyang liog og bakos dayon giguroy daw iro palibot sa ilang balay dihang nagka-away kini sa iyang papa, matud pa sa bata nakuyapan gyud siya niadtong higayuna.

Sa affidavit sa bata, sa tuig 2008 lang usab niini gibutyag nga hasta ang iyang manghod nga babaye gimaltrato usab sa duha, dihang ilaha kining gipalayas ug gipang-itsa sa gawas ang mga sinina sa iyang manghod.

Niadtong bulan sa Hunyo 2008, matud pa niya gihapsan siya og bilya sa bakos sa iyang stepmother ug naigo ang iyang walang dughan nga hangtud sa pagsumbong niya sa awtoridad wala pa gihapon kini maayo.

Atol sa iyang birthday nianang bulan sa Hulyo sa 2008, gikatahong kalit siyang gipatid-patiran sa iyang stepmother diha sa dughan samtang siya nagsaka sa hagdan nga maoy hinungdan nga diriyot siya matagak, gilambahan usab siya niini og pultahan sa maong hitabo.

Dihang nag-away ang iyang amahan ug iyang stepmother nakatulog ang iyang amahan, aron lang makamata kini, ang biktima maoy gipasiritan og insecticide ug gibuboan og alcohol sa nawong sa iyang stepmother.

Sumala pa niya duna say mga higayon nga paeskuylahon sila sa ilang stepmother nga walay bawon, maong ang iyang manghod magpangayoan og makaon sa iyang mga classmate, kini say gitudlong hinungdan nga nasakit og hepatitis ang iyang manghod, apan imbes tabangan ang iyang manghod giingong gibasol pa hinuon nila kini tungod kay kini hugawan.

Laing pagpangabusong giingong gibuhat kaniya mao ang pagpapuyo kaniya sulod sa unom ka adlaw gawas sa ilang balay nga walay extra nga sinina, pagkaon o bisan na ikaligo, ang mga silingan mao ray sekretong mipakaon kaniya.

Dugang reklamo sa bata mao nga dunay higayon nga gimartilyo sa duha ang ilang mga kuko tungod kay hugaw, giduslak siya og toothpick gumikan lang kay dugay siyang naka-order og pagkaon sa usa ka department store sa North Reclamation Area ug uban pa.

Ang bata mibutyag nga niadtong Septiyembre 7, 2008 sa gabii gidala siya sa iyang amahan sakay sa ilang awto diha sa may Redemptorist Church ug giingnang “___naog na, bahala ka na sa panginabuhi mo, wala nako labot nimo.”

Ang bata gisagop sa simbahan sa Archdiocesan lady of Lourdes Paris sa Labangon pagkasunod adlaw human makit-i ni Fr. Anastacio “Taz” Urot .

Gihulagway sa volunteer nga maoy gidad-an sa pari sa bata nga nanglagom ang mga kuko, hilis ang sapatos, hugaw ug gisi-gisi na ang mga sapot sa bata ug duna kini mga lagom-lagom sa kalawasan lakip na sa liog.

Dihang gipangutana, ang bata mitug-an sa iyang gidangatan sa mga kamot sa iyang ginikanan. Ang simbahan na maoy nangita og paagi pagpangita sa apuhan sa bata sa side sa iyang tinuod nga inahan ug gi-turnover kini ngadto kanila.

Matud pa sa maong volunteer nga nahadlok ang bata nga modangop sa mga polis ni bisan na sa DSWD sa kabalakang itugyan siya og balik ngadto sa mga suspek. - Uban sa report ni Jasmin Uy (BANAT NEWS)