Barilinhon wad-ag paglaom

CEBU, Philippines – Nawad-an og paglaum ang taga Barili nga may kauswagan pang makab-ot ang ilang lungsod kon magpabilin ang mga opisyal niini nga walay katakos ug walay konsensya.

Mao kini ang gibutyag ni Rene Alquizola, usa sa mga molupyo sa Barili nga namati sa mga sentimento sa iyang tagi-lungsod ug nagpaniid usab sa lihok sa mga opisyal sa lungsod .

Si Alquizola kinsa anak sa kanhi Bise Mayor sa maong lungsod ug maguwang ni kanhi mayor Roberto Bobby Alquizola nagkanayon nga gibati siya og kaulaw dihang nasayran niya nga atol sa usa ka opisyal nga biyahe sa mga konsehal ug mga kapitan sa barangay sa ilang lungsod ngadto sa Makati City, ang gihimo sa pipila sa maong mga opisyal , sa didto na sila sa Makati, mao lang ang pag “good time” kon pahayahay nga gani wala na kuno makatambong pa pagkasunod adlaw sa dakong panagtagbo nga maoy tunong sa ilang biyahe didto.

Si Alquizola maoy naanugonan sa kuwarta sa lungsod nga maoy gigasgto sa plete, pagpuyo sa hotel, pagkaon ug allowance sa maong mga opisyal sa maong panaw.

Si Alquizola kinsa kanhi manager sa DyMR Radyo ng Bayan Cebu nasayod nga ang budget sa matag usa sa maong biyahe, mao ang P4,000 para sa hotel, P5,000 plite sa eroplano, ug allowance nga tag P800 matag adlaw sa matag usa, nga ang tanan naggikan sa panudlanan sa lungsod.

Si Alquizola nagkanayon nga naanugonan ang mga molupyo sa maong gasto kay kon gipamalit pa lang unta to og mga libro sa mga bata nga nanagtungha daghan unta ang malipay.

Sa kadako sa maong kantidad nga gigahin sa lungsod, makapamalit pa gani unta og mga tambal ang kagamhanan alang sa mga kabus nga Barilinhon.

Alang kang Alquizola nga sa umaabot nga election mas maayong mapili gyud sa mga taga Barili ang mga tawong may katakos ug may konsensya sa pagpreserbar sa salapi sa lungsod nga kon gamiton man, mahapak gyud sa mga maayong butang nga ikaayo sa mga lungsoranon.

Busa giawhag ni Alquizola ang iyang mga silingan sa Barili nga angayan na nga magmata sila karong panahona aron sa umaabot nga piniliay pilion lamang kadtong mga tawo nga molaban gyud sa kaayohan sa mga molupyo sa lungsod. – Wen Celen (BANAT NEWS)