Hubog nag wild sulod sa presinto sa Malabuyoc

CEBU, Philippines – Anha na natulog sa karsel sa kapolisan sa Malabuyoc ang usa ka lalaking giingong hubog nga nag-wild ug nanghagit og sukmagay sa mga police dihang gibadlong tungod sa iyang pagkulata sa kapuyo niadtong Biyernes sa hapon sa barangay Armeña sa lungsod sa Malabuyoc.

Ang nakatulog og prisohan giilang si Josesimo Cadungog nagpuyo sa nahisgutang dapit, kinsa gumikan sa kahubog hasta ang patrol car nga gisakyan kaniya iyang gipatid-patiran ug pagsulod sa karsel gikatahong nagwala na usab kini ug gipangguba ang faucet sa pansayan ug giparok-parok ang iyang ulo. Ang suspek gidakop human maagii ni SPO1 Mario Paler kinsa sakay sa iyang multicab paingon na nga mopauli, matud pa sa maong polis nakit-an niya ang akusado nga migukod ug mikulata sa usa ka babaye (kapuyo diay niini).

Hinungdan nga iya kining gihunongan ug gibadlong apan inay mopatuo nag-wild hinuon ug wala na mopatuo sa   maong police nanghagit pa og sinukmagay.

Gumikan sa iyang kabalaka nga dili niya makontrolar si Cadungog tungod sa kahubog nanawag siya’g backup nga police ug naabot sila si PO2 Antonio Esclin ug mga kaubanan.

Ang suspek human dakpa nagwala sulod sa patrol car hinungdan sa pagkaliki sa mga samin niini ug pagkalumping sa bungbong, pag-abot sa presinto miusab na usab og wild ang suspek hangtud nga gidala kini sa tambalanan gumikan sa mga samad diha sa iyang mga kamot. Ang akusado gipatambalan ug gipaubos sa liquor test alang na sa pagpasaka nilag kasong direct assault ug malicious mischief. – Guam Logroño (BANAT NEWS)