...pagkwestyon ni Cortes gikataw-an lang ni Ruiz

CEBU, Philippines – Nagkatawa lang si Kongresista Nerissa Soon Ruiz sa ikaunom nga distrito sa lalawigan sa Sugbu sa pagkabalaka og maayo ni Mandaue City mayor Jonas Cortes ug sa mga kaalyado niining konsehal sa pagkatudlo kaniya isip interim vice president sa partido Lakas-Kampi.

Matud pa ni Ruiz nahibulong nalang siya kun nganong gibati karun og tumang kabalaka si Cortes ug mga sakop niini nga unta wala pa may naumol nga by-laws sa bag-ong nag-ipong duha ka partido.

Gikaingong kwestyunon ni Cortes kang Presidente Gloria Macapagal Arroyo ang bag-ong appointment ni Ruiz, apan ang naulahi miklarong wala niya pangayoa ang maong pwesto ug gani siya mismo nahibulong dihang gitunol kaniya ang appointment sa partido sa maong posisyon.

Si Ruiz mipadayag nang daan nga atbangan si Cortes sa umaabot 2010 eleksyon pagkamayor sa dakbayan human sa pagkapupos sa iyang ikatulong termino isip kongresista sa 6th District.“Gikatahong si Cortes nabalakang makapalibog lang kini ilabina sa ilang distrito pagtudlo unya og mga kandidatu nga paluyohan sa partido sa umaabot piniliay.

Hinuon laing opsyon ni Cortes nga mohangyo siya og free zone sa ilang distrito kun hingusgan gyud ni Ruiz nga maoy mahimong opisyal nga kandidatu sa partido pagka-mayor sa Mandaue atbang kaniya. Apan giangkon sab ni Cortes nga mas nakabentaha siya kun sagupon sa partido ang equity of the incumbent.

Giawhag hinuon ni Ruiz si Cortes nga dili una mamolitika kay layo pa kaayo ang eleksyon ug mas kinahanglang atimanon sa naulahi ang pagtukod og mga proyekto diha sa dakbayan sa Mandaue nga maoy gipaabot sa kadaghanan sa mga Mandauehanon. – Rey Pasaporte (BANAT NEWS)