Drayber sa Capitol giseminar

CEBU, Philippines – Gipaubos sa orientation seminar sa Land Transportation Office ang tanang mga driver sa Kapitolyo aron malikayan ang disgrasya sa kadalanan.

Si Governor Gwendolyn Garcia maoy mipagawas og kamanduan sa pagseminar pag-usab sa tanang mga driver sa Kapitolyo human usab niya nahibaw-an nga pipila na ka mga bag-ong sakyanan sa lalawigan ang nangabangga ug nakadisgrasya tungod sa giingong kakulang sa training ug kahibawo sa driver. Segon sa report labing minus upat ka mga bag-ong KIA vans, nga mobalor og kapin sa usa ka milyon pesos matag usa ang nakasugat og disgrasya sa kadalanan ug gibasol ang insidente ngadto sa nagmaneho niini.

Kapin usa ka gatus ka mga driver ang gipaubos sa tulo ka adlaw nga seminar diha sa may capitol social hall nga nagsugod niadtong adlaw nga Miyerkules.

Sumala pa sa gobernadora nga angayan nga ampingan ug atimanon gyud sa mga drivers ang maong sakyanan sa Kapitolyo tungod kay mga buhis sa mga Sugbuanon ang gigamit sa pagpalit niini.

Gipahinumduman usab sa gobernadora ang mga driver mosusi gyud nga na-renew ang lisensiya ug kompleto ang tanang mga dokumento sa sakyanan sa dili pa momaneho.

Dugang pahimangno sa gobernadora nga subayon gyud ang mga lagda sa trapiko ug dili magsalig nga gobiyerno ang nanag-iya sa sakyanan maong dili na lamang motuman sa traffic rules nga mosangput na hinuon ngadto sa aksidente sa kadalanan. – Chester Abadilla (BANAT NEWS)