Polis diskontento sa pagbasura sa kaso ni Jastiva

CEBU, Philippines – Moduso og motion for reconsideration ang kapulisan sa dakbayan sa Sugbu human gibasura sa piskaliya ang kasong parricide nga ilang gipasaka batok ni Pastor Leonardo Jastiva, presidente sa International Missionary Society of the Seventh day Adventist Church.

Kini maoy gibutyag ni Sr. Supt. Patrocinio Comendador, hepe sa kapulisan sa dakbayan sa Sugbu human gibasura ang parricide case nga wala na gani susiha ang uban pang ebidensya sa kaso.

Matud pa ni Comendador nga sa pagkakaron wala pa sila makadawat sa resolution sa piskalya labot sa maong kaso apan nangandam na silang daan sa ilang pagabuhaton sa re-filing sa kaso.

Usa sa mga giingong ebidensya nga wala hatagi og gibug-aton mao ang mga mensahe sa cell phone ni Jastiva nga sa pagkakaron ila pang ipa-ubos sa forensic examination ngadto sa National Telecommunication Commission (NTC) nga gihulagway niyang usa sa bug-at nilang ebidensya.

Sentro pa sa imbestigasyon ang cellphone messages ingon man ang sakyanang gigamit.

Apan iyang giangkon nga usa sa nakahatag nila’g problema sa maong kaso batok kang Pastor Jastiva mao mismo nga ang pamilya sa asawa niining biktima nga si Judith nga walay plano sa pagpasaka’g kaso sa maong pastor.

Nasayran nga si Judith Jastiva gidagit niadtong Pebrero 9 ning tuiga dihang uban ni Pastor Jastiva diha sa Banawa barangay Guadalupe diin si Pastor Jastiva gikadenahan sa tulo ka mga suspetsadong nagsakay og awto.

Pebrero 18 dihang nakit-an ang patay’ng lawas ni Judith sa barangay Tabunan ning dakbayan, apan si Pastor Jastiva gidakop sa kapulisan pagka- Pebrero 18 human nasuta nga ang usa sa duha ka cell phone niini maoy gigamit nga nagpailang kidnappers. – Guam Logroño (BANAT NEWS)