Misa pahinungod kang Cory himuon dinhi

CEBU, Philippines – Mopasiugda og usa ka Santos nga Misa ang kagamhanan sa dakbayan sa Sugbu alang sa daling pagkaayo sa balatian ni kanhi Presidente Corazon “Cory” Aquino.

Kini pinaagi usab sa pagpakig-alayon sa Downtown Revitalization nga gipanguluhan sa presidente niini nga si George Chiu nga himuon sa adlaw’ng Martes sunod semana, anha sa lobby sa Cebu City Legislative Building.

Apan nanawagan si Chiu ngadto sa mga Sugbuanon nga motabang sa pag-ampo alang sa daling pagbalik sa kalagsik sa kanhi presidente.

“We encourage the public to pray for the health of Cory Aquino and her family,” nagkanayon si Chiu.

Kini tungod kay ang kanhi pangulo giingong dako og natabang pagbangon sa demokrasya sa nasod gikan sa diktadoryang pamunuan.

Gani gitawag ni Chiu si Cory nga maoy inahan sa demokrasya sa nasod tungod sa pagpangulo niini nga mahibalik ang kagawasan sa Pilipinas.

Ang kanhi presidente una nang na-diagnose nga dunay colon cancer nga maoy hinungdan sa kanunay niining pagkalandig sa tambalanan.

Human makagawas sa ospital sa miaging mga adlaw, si Aquino dali usab nga gibalik sa tambalanan tungod kay kini giingong wala nay ganang mukaon.

Gikataho hinuon nga ang kanhi presidente nakagawas na gikan sa Intensive Care Unit (ICU) sa Makati Medical Center apan pabiling giobserbahan. – Elly Bolonos (BANAT NEWS)