KEPCO motunol $1-milyon sa Kapitolyo

CEBU, Philippines – Ang management sa Korean Power Corporation (KEPCO) nga nakabase sa lungsod sa Naga mobayad   og usa ka milyon ka dolyar ngadto sa kagamhanan sa lalawigan sa Sugbu.

Kini agi og paghatag sa ilang pasiunang bayad bugti sa paghipos sa kagamhanan sa lalawigan sa Sugbu sa mga abo nga ibugwak unya sa ilang coal power generating plant.

Ang maong kasabutan nalakip sa pirmahan unya nga Memorandum of Agreement (MOA) tali sa KEPCO ug sa kagamhanan sa probinsiya sa Sugbu.

Nakab-ot ang maong kasabutan sa dihang nakapangita og pamaagi ang kagamhanan sa lalawigan og solusyon sa reklamo sa mga residente sa lungsod sa Naga ug kasikbit nga lugar nga makadaut sa panlawas sa mga molupyo ang ibugwak unya nga mga abo gikan sa planta sa KEPCO.

Ang maong MOA naglatid nga ang KEPCO mobayad sa kagamhanan sa lalawigan alang sa pagkuha sa mga waste materials gawas sa maong planta.

Samtang ang kagamhanan sa probinsiya mogamit sa maong waste materials gikan sa KEPCO sa pag-abuno sa 25 ka ektaryang luna sa may Balili Beach sa barangay Tinaan lungsod sa Naga nga planong tukuran og industrial estate sa maong lungsod.

Si Gobernador Gwendolyn Garcia nga maoy mopirma unya sa naasoy’ng MOA sa habig sa lalawigan, gikatahong mogamit sa maong kantidad alang sa pagpalambo sa kahimtang sa panlawas sa apektadong mga molupyo ug ingon man ang pagpalapad sa industrialization program sa lungsod sa Naga ubos sa pamunuan ni Mayor Valdemar Chiong. – Chester Abadilla (BANAT NEWS)