CEBU, Philippines – Usa ka lalaki nga gituohang naghikog pinaagi sa paghigot og bakos sa iyang liog ang nadiskubrehang nagbitay sulod sa ilang panimalay sa sitio Sto. Niño sa barangay Jagobiao, dakbayan sa Mandaue alas 3 pasado ang takna sa hapon niadtong miaging adlaw.
Si Inspector George Aniñon, hepe sa homicide section sa Mandaue City Police Office (MCPO) nga nahinabi sa Banat News miila sa namatay nga mao si Giovanni Diagro, 30, nagpuyo sa maong dapit.
Matud pa ni Insp. Aniñon nga nadunggan sa mga silingan ang agulo niini ug dali nila kining gisusi ug gidala sa Everseley Child Sanitarium Hospital sa barangay Jagobiao apan gideklarar kini sa mga doktor nga patay na kining nahidangat ngadto kanila.
Si Marites nga asawa sa biktima nga gisukitsukit sa kapolisan miangkon nga nag-away sila sa iyang bana tungod sa kanunay nga pangabubho niini ngadto kaniya.
Makadaghan na usab niyang gireklamo ang iyang bana sa kapolisan tungod sa giingong pagpanakit niini kaniya panahon sa ilang panag-away.
Dugang pa niya nga nag-inusara nga nahibilin sa ilang panimalay ang iyang bana sanglit milakaw siya tungod kay dunay gipalit nianang tungora. – Romeo Limpangog (BANAT NEWS)