CEBU, Philippines – Kusganong gipanghimakak sa mga opisyales sa One Visayas nga ang ilang kahugpongan sa mga rehiyon dili usa ka political group ug labaw nang dili political machinery.
Sumala pa sa usa sa nangulo sa One Visayas nga si Antique Governor Sally Perez nga ang katuyoan sa maong kahugpungan mao ang pagpalambo sa kultura ug arts sa matag lalawigan sa kabisay-an nga gilangkuban sa Rehiyon 6, Rehiyon 7 ug Rehiyon 8.
Ang pagpasabut ni Perez gihimo atol sa gipahigayon nga Regional Development Council Meeting sa sulod sa Kapitolyo.
Kini human usab makadawat og daghang mga pakisusi sa pipila ka mga politiko nga nakabase dinhi sa Manila kun wala bay mga kandidato sa pagka-presidente, bise-presidente ug pagka-senador nga paluyohan ang maong grupo.
Nagkanayon si Perez nga ang konsepto sa One Visayas naumol sa mga chairpersons Regional Development Council kon RDC sa tulo ka mga rehiyon diin siya sa Region 6, si Gobernador Gwendolyn Garcia sa Region 7 ug si Tacloban Mayor Mel Sarmiento sa Region 8.
Gihimong ehemplo niini mao ang bag-ohay pa lamang nga nahuman nga pinakaunang One Visayas Culture and Arts didto sa Cebu International Convention Center kon CICC niadtong nakalabay nga bulan.
Gitataw ni Perez sa dihang mibisita sa Kapitolyo sa Sugbu nga ang ilang sunod nga kalihukan sa One Visayas karon unta nga tuig 2010, apan tungod sa presidential ug lokal nga bugnong lugaynon sa sunod tuig ilang giuktaba ang maong kalihukan ngadto na sa tuig 2011 didto na sa Capiz City sa lalawigan sa Antique ubos sa pagdumala sa administratyon sa probinsiya. – Chester Abadilla (BANAT NEWS)