German gisaka giluba naangol

CEBU, Philippines – Naangol ang usa ka German national human kini gisaka sa balay sa nagmaskarang lalaki nga kalit midunggab kaniya samtang nagkalingaw og tan-aw sa telebisyon kauban ang asawang Pilipina diha sa sitio Suba, barangay Maya lungsod sa Daanbantayan niadtong miaging gabii.

Ang biktima mao si Hernan Kruse, 68, minyo nga nagpuyo sa maong lugar kauban ang asawang si Zenita Kruse.

Matud pa ni PO3 Mamerto Gastador sa Daanbantayan Police dihang nahinabi sa Banat News, nanan-aw og salida sa telebisyon ang magtiayon niadtong higayuna dihang nakadungog kini sa pagsige og paghot sa ilang iro.

Daling gisusi sa biktima ang kasaba sa ilang iro ug dihang iyang gi-ablihan ang pultahan aron unta mogawas gisugat kini sa wala mailhing tawo ug dayung dunggab og kutsilyo sa tiyan niini dayon nagdaling miikyas palayo sa dapit.

Ang asawa na sa biktima maoy nangayo og panabang ug gidali kini pagdala sa Daanbantayan District Hospital ug giingong luwas na sa peligro.

Subay sa imbestigasyon sa kapulisan gikan sa biktima ingon man sa asawa niini wala gyud sila makaila sa suspek gumikan kay nagsul-ob kini og maskara sa iyang nawong.

Lain-laing anggulo karon ang gitutukan sa kapulisan sa ilang imbestigasyon nga naglakip sa posibleng anggulong pagpanulis ug personal nga kasuko sa mamumuno ngadto sa biktima sanglit nakahipos ang kapolisan og impormasyong medyo may pagka- garbuso ang biktima ingon man arogante kini sa maong lugar maong daghan ang naglagot nga mga silingan. – Darrel Carumba (BANAT NEWS)